|
Giorgio Infantino |
Riceviamo e pubblichiamo.
“LI BIDDRIZZI E LI
DINARI”
Rosa, una picciotta iuculana,
beddra di facci cu la vucca risa,
lu pettu tunnu, cu dui lampiuna,
capiddri biunni, pariva na dama,
chiddra ca tieninu li baruna.
Ninu, era furmatu tutt’umpezzu,
lu sidiri grossu
comu un matarazzu,
e Ninu piddra Rosa
ni era pazzu.
Diciennuci: “Rusina,
si tu ti pigli a mmia
aiu la casa, li grana,
e lu turrenu a la Scintilìa,
la casina, li crapi, li piecuri,
na mannira sana,
li iumenti, du stalluna,
pi ttia lu fieu di la chiana.
Aiu li vutti chini, lu vignetu,
inzumma, sugnu buonu cuminatu.
Rosa…
tiegnu sordi dintra na quartara,
la vesta ti la fazzu di zaffira,
scippami l’occhi mia
cu li suspiri,
sugnu riccu
ti pozzu spusari”.
“Aiu la testa dura
comu un mulu,
schifiu a ttia,
li grana e li to bbeni,
sugnu na donna
di pochi paroli,
cu ttia vicinu
muoru di li peni,
restu comu terra
senza suli”.
Certu l’amuri nun si lassa accattari
cu proprietà e beni tirreni,
mai ci si devi scuraggiri
e aviri pi sti cosi guai e peni.
Si c’è qualcunu ca ti respingi,
ci sarà qualcunu ca t’accogli,
nun ti la pigliari e nun fari sbagli,
cerca e prova ad autri banni,
ci sunnu tanti autri uomini
e ci sunnu tanti autri donni.
Giorgio Infantino (da Wolfsburg - Germania)
© Riproduzione riservata.
|
|
rotte.info:
periodico indipendente d'informazione del paese di Grotte
(provincia di Agrigento).
